Jer 39 | NdeIBE | STEP | IJerusalema lathunjwa kanje: Ngomnyaka wesificamunwemunye kaZedekhiya inkosi yakoJuda, ngenyanga yetshumi, uNebhukhadinezari inkosi yaseBhabhiloni waya eJerusalema lebutho lakhe lonke wayivimbezela.

Jeremiah 39

Ukuwa KweJerusalema

1 IJerusalema lathunjwa kanje: Ngomnyaka wesificamunwemunye kaZedekhiya inkosi yakoJuda, ngenyanga yetshumi, uNebhukhadinezari inkosi yaseBhabhiloni waya eJerusalema lebutho lakhe lonke wayivimbezela.

2 Ngosuku lwesificamunwemunye lwenyanga yesine, yomnyaka wetshumi lanye kaZedekhiya umduli wedolobho wadilizwa.

3 Emva kwalokho zonke izikhulu zenkosi yaseBhabhiloni zafika zahlala eSangweni laPhakathi: kwakunguNerigali-Sharezeri oweSamugari, loNebho-Sarisekhimi induna yezikhulu, loNerigali-Sharezeri, indunankulu kanye lezinye zonke izikhulu zenkosi yaseBhabhiloni. 4 Kwathi lapho uZedekhiya inkosi yakoJuda lamabutho wonke bebabona babaleka. Basuka edolobheni ebusuku ngendlela yasesivandeni senkosi, baphuma ngesango eliphakathi kwemiduli, baqonda e-Arabha.

5 Kodwa ibutho lamaKhaledi laxotshana labo, lafica uZedekhiya emagcekeni aseJerikho. Lamthumba, laselimusa kuNebhukhadinezari inkosi yaseBhabhiloni eRibhila, elizweni laseHamathi, lapho amgweba khona. 6 Inkosi yaseBhabhiloni yawabulalela khona eRibhila amadodana kaZedekhiya emehlweni akhe, yabulala lezikhulu zasesikhosini zonke zakoJuda. 7 Emva kwalokho uZedekhiya yamkhupha amehlo yasimbopha ngamaketane ethusi ukuba imuse eBhabhiloni.

8 AmaKhaledi atshisa isigodlo ngomlilo lezindlu zabantu, adiliza lemiduli yeJerusalema.

9 UNebhuzaradani umlawuli wabalindi besikhosini, wathatha abantu ababesele edolobheni ndawonye lalabo ababebalekele kuye kanye labanye abantu wabasa ekuthunjweni eBhabhiloni. 10 Kodwa uNebhuzaradani watshiya elizweni lakoJuda abanye babantu abangabayanga ababengelalutho olungolwabo; njalo ngalesosikhathi wabapha izivini lamasimu.

11 UNebhukhadinezari inkosi yaseBhabhiloni wayelaye uNebhuzaradani umlawuli wabalindi besikhosini ngoJeremiya wathi, 12 “Umthathe, umgcine kuhle; ungamlimazi kodwa umenzele konke akucelayo.” 13 Ngakho uNebhuzaradani umlawuli wabalindi, loNebhushazibhani induna yezikhulu, loNerigali-Sharezeri indunankulu kanye lezinye zonke izikhulu zenkosi yaseBhabhiloni 14 bathumela ukuba uJeremiya asuswe egumeni labalindi. Bamnikela kuGedaliya indodana ka-Ahikhami, indodana kaShafani, ukuba ambuyisele kibo. Ngakho wahlala labantu bakibo.

15 UJeremiya esavalelwe egumeni labalindi, ilizwi likaJehova lafika kuye lathi, 16 “Hamba ku-Ebhedi-Melekhi umKhushi uthi kuye, ‘UJehova uSomandla, uNkulunkulu ka-Israyeli uthi: Sekuseduze ukuba ngigcwalise amazwi ami ngedolobho leli ngokulehlisela umonakalo, hatshi ukuphumelela. Ngalesosikhathi azagcwaliseka phambi kwamehlo enu. 17 Kodwa ngizakuhlenga ngalolosuku, kutsho uJehova; kawuyikunikelwa kulabo obesabayo.

18 Ngizakusindisa, kawuyikubulawa ngenkemba kodwa uzaphunyuka lokuphila kwakho, ngoba ungithembile, kutsho uJehova.’ ”